Heilbrigðisráðherra hefur gert samkomulag um þjónustu við fólk með geðraskanir á Akranesi og nágrenni. Samkomulagið felur í sér að heilbrigðisráðuneytið veitir styrk til að byggja upp stoðþjónustu á Akranesi sem felst í atvinnu, endurhæfingu og dagþjónustu við fólk sem býr við geðfötlun.

Styrkurinn er veittur Endurhæfingaklúbbi örykja sem veitir þjónustu í samræmi við lög um málefni fatlaðra og lög um heilbrigðisþjónustu. Verkefnið tekur til endurhæfingar fólks með geðraskanir á Akranesi og nágrenni með ráðningu heilbrigðisstarfsmanns í tengslum við Sjúkrahúsið og heilsugæslustöðina á Akranesi.

Fram kemur í tilkynningu frá heilbrigðisráðuneytinu að með samkomulaginu vilji heilbrigðisráðherra leggja sitt af mörkum til að auka og tryggja að þær stofnanir, sem sinni hópnum sem njóta eigi þjónustunnar, vinni saman með hagsmuni skjólstæðinga sinna að leiðarljósi. Þetta þýði að Akraneskaupstaður, Sjúkrahúsið- og heilsugæslustöðin á Akranesi, Svæðisskrifstofa málefna fatlaðara Vesturlandi og  Akranesdeild Rauðakross Íslands fái nú aukið svigrúm og skýrara markmið um að vinna saman.

Starfsemi „Endurhæfingarklúbbsins“ er tilraunaverkefni til þriggja ára, frá 1. janúar 2008 til 31. desember 2010. Aðilar að verkefninu eru Akraneskaupstaður, Sjúkrahúsið- og heilsugæslustöðin á Akranesi, Svæðisskrifstofa málefna fatlaðara Vesturlandi og  Akranesdeild Rauðakross Íslands. Markmið klúbbsins er að skapa vettvang fyrir batahvetjandi stuðningsúrræði fyrir fólk með geðraskanir.

Greinargerð um umfang og árangur verkefnisins skal liggja fyrir árlega eigi síðar en 1. febrúar ár hvert.