Eigendum innlendra hlutabréfa fjölgaði um 20 þúsund milli áranna 2005 og 2006 samkvæmt upplýsingum um skattframtöl einstaklinga sem skilað var árið 2007.

Í byrjun síðasta árs áttu 70.211 af þeim 233.522 sem töldu fram til skatts á Íslandi hlutabréf, eða 30,1 prósent. Árið áður var sá fjöldi 50.211 manns eða 22,1 prósent allra þeirra sem skiluðu framtali.

Engin sjáanleg ástæða

Einar S. Sigurðsson, framkvæmdastjóri Verðbréfaskráningar Íslands, segist ekki sjá í fljótu bragði að einhver kerfislæg skýring sé á þessari miklu aukningu. Verðbréfaskráningin muni þó skoða málið. „Okkur er ekki kunnugt um ástæðuna fyrir þessu nema þá vegna útgáfu á nýjum bréfum. En það skýrir ekki allan þennan mun.“

Aðrir sérfræðingar, sem 24 stundir ræddu við, kunnu ekki skýringar á þessari miklu breytingu á hlutabréfaeign framteljenda á milli ára.

Fleiri eiga í erlendum bréfum

Þá hefur þeim Íslendingum fjölgað gífurlega sem eiga hlutabréf í erlendum fyrirtækjum. Þeir voru 4.800 árið 2005 eða 2,1 prósent allra þeirra sem töldu fram til skatts á Íslandi.

Sá fjöldi rauk upp árið 2006 og í lok árs áttu alls 15.434 Íslendingar erlend hlutabréf. Það gera 6,6 prósent allra framteljenda.

Eigendum innlendra hlutabréfa hefur ekki fjölgað jafnmikið milli ára í áratug. Árið 1996 voru hluthafar í innlendum hlutafélögum tæplega 26 þúsund en voru orðnir rúmlega 37 þúsund árið eftir.

Ekki fjölgun við bankasölur

Stærstu hlutafjárútboð Íslandssögunnar fóru síðan fram árið 2002 þegar íslenska ríkið seldi hlut sinn í Landsbanka Íslands annars vegar og Búnaðarbanka Íslands, s íðar Kaupþingi, hins vegar.

Þessi tvö útboð fjölguðu þó ekki þeim eigendum innlendra hlutabréfa heldur dróst sá hópur þvert á móti saman um nokkur hundruð manns árið 2002. Af þeim tugum þúsunda, sem skráðu sig fyrir bréfum í bönkunum, voru allmargir sem höfðu lánað kennitölur sínar til annarra fjárfesta og svo virðist einnig sem meiriparturinn hafi selt bréfin fljótlega á nýjan leik.

Þekkir þú til?

Í hnotskurn

Ríkisskattstjóri heldur utan um tölur um hlutabréfaeign einstaklinga og hjóna sem telja fram til skatts. Á skattframtali hvers árs gefur fólk upp hlutabréfaeign sína árið áður.