Innlent | mbl | 29.3.2008 | 14:29 | Uppfært 15:05

Mannréttindabrotum mótmælt

Frá mótmælunum í dag. mbl.is/Guðmundur Rúnar

Um sextíu manns efndu til mótmæla fyrir utan Kínverska sendiráðið í Reykjavík klukkan eitt í dag. Forsvarsmaður hópsins sagði að verið væri að stofna samtökin Vinir Tíbets sem vilja vekja athygli á mannréttindabrotum Kínverja í Tíbet.

Mótmælin fóru friðsamlega fram og var þeim lokið um klukkan tvö enda er ákaflega kalt í veðri til að standa langar mótmælastöður.

Frumsýndur var baráttubolur sem Jón Sæmundsson hefur hannað og til stóð að rapparinn Poetrix stigi á stokk með mótmælarapp en það atriði mun frestast fram á mánudag klukkan fimm er efnt verður til nýrra mótmæla á sama stað og þá verður gengið frá sendiráðinu að Alþingishúsinu við Austurvöll og þingmönnum afhent ályktun mótmælafundarins í dag.

Mótmæli í Madrid

Nokkur hundruð manna efndu af sömu ástæðu til mótmæla fyrir utan sendiráð Kína í Madrid. Þar stóðu menn í tvær klukkustundir og fóru mótmælin friðsamlega fram. Tíbeski munkurinn Thubten Wangchen hélt ræðu þar sem hann sakaði kínversk yfirvöld um þjóðarmorð og pyntingar í aðgerðunum í Lhasa undanfarna daga.

Kallaði hann eftir aðgerðum alþjóðasamfélagsins og að Sameinuðu Þjóðirnar rjúfi þögn sína í málinu.