Innlent | mbl | 31.3.2008 | 17:16

Árni reiðubúinn til viðræðna

Fjármálaráðherra segist vera reiðubúinn til viðræðna við fulltrúa atvinnubílstjóra, sem staðið hafa fyrir mótmælum á götum borgarinnar undanfarna daga og krafist þess að álögur á eldsneyti verði lækkaðar.

„Ef þeir vilja tala við mig þá er sjálfsagt að finna einhvern flöt á því,“ segir Árni M. Mathiesen fjármálaráðherra. Ráðherrar ríkisstjórnarinnar reyni ávallt að vera aðgengilegir fólkinu í landinu til að ræða mikilvæg mál.

Árni segir að aðgerðir atvinnubílstjóranna séu ekkert sérstaklega uppbyggileg sem fyrstu skref í því að gera breytingar á kerfinu. „Maður veit þó aldrei hvaða gott getur komið út úr hlutunum.“

Aðspurður um hvort ríkið hyggist lækka álögur á eldsneyti segir Árni að nú séu starfandi þrjár nefndir á vegum ríkisstjórnarinnar sem hafi þessi mál til skoðunar.

Í fyrsta lagi nefnd sem á að gera breytingar á gjaldtöku á farartækjum og eldsneyti, með tilliti til að samræma hana og gera hana umverfisvænni. Árni segir að von sé á skýrslu frá nefndinni innan tíðar.

Í öðru lagi er starfandi nefnd á vegum samgönguráðuneytisins sem skoðar almenningssamgöngur.

Í þriðja lagi nefnd á vegum viðskiptaráðuneytisins sem skoðar samgöngur á landsbyggðinni, og hugsanlega jöfnun á þeim kostnaði.

„Ég held að við ættum að fara varlega í það að gera einhverjar breytingar í fljótræði. Við viljum auðvitað hafa hér kerfi sem skilar því sem það á að skila, og er ekki sífellt verið að breyta og hringla í,“ segir Árni.