Algengt er orðið að settar séu öryggismyndavelar utan á fjölbýlishús og innan í stigaganga þeirra. Þetta segir Sigurður Helgi Guðjónsson, formaður Húseigendafélagsins sem telur notkun öryggismyndavéla í fjölbýlishúsum hafa gefist vel.

„Félagsbústaðir riðu á vaðið með þetta fyrir nokkrum árum,“ segir Sigurður Helgi. „Það höfðu verið skemmdarverk framin mikil í stigagangi, en þegar myndavélar voru settar þar upp gjörbreyttist umgengnin um sameignina.“

Í Asparfelli í Efra-Breiðholti eru rúmlega tuttugu öryggismyndavélar. Eru þær bæði staðsettar utan á blokkinni og inni í stigagangi hennar; meira að segja í lyftum.

„Það voru skiptar skoðanir um vélarnar í upphafi,“ segir Kjartan Tryggvason, húsvörður í Asparfelli. Hann segir vélarnar hafa fælingarmátt og hafa nýst til að upplýsa innbrot og skemmdarverk á bílum. „Ég held að í heildina sé ánægja með vélarnar í dag.“

Gunnar Gunnarson, varaformaður húsfélagsins í Æsufelli 4, tekur undir með Kjartani, en í og utan á Æsufellsblokkinni er einnig nokkuð um myndavélar.

Þeir segja efni öryggismyndavélanna einungis skoðað ef kvörtun berst um ólöglegt athæfi.

Samkvæmt upplýsingum frá Persónuvernd eru ekki til reglur sem snúa sérstaklega að öryggismyndavélum á og við fjölbýlishús. Almenna reglan sé sú að vöktuð svæði þurfi að vera merkt og tilgangurinn með vöktuninni að vera málefnalegur.

Að sögn Sigurðar Helgi er nóg að fyrir liggi samþykki einfalds meirihluta til að húsfélag megi setja upp öryggismyndavél í fjölbýlishúsi, en tekur fram að tilgangurinn þurfi ávallt að vera málefnalegur.

Í hnotskurn