Í nýrri kjarakönnun sem Capacent Gallup hefur gert fyrir Bandalag háskólamanna kemur í ljós að félagsmenn telja að laun þeirra þyrftu að hækka um 26-28% til að geta talist sanngjörn. Munur á meðallaunum karla og kvenna reynist 13,3% en þar af er kynbundinn launamunur 5,7%.

Kynbundinn launamunur er minnstur hjá félagsmönnum 30 ára og yngri.  Helmingur aðspurðra telja sig ekki eiga möguleika á launahækkun í starfi sínu og er aðalástæðan þar að baki að laun eru fastbundin af kjarasamningum að mati félagsmanna BHM.

Í tilkynningu kemur fram að Capacent Gallup hefur einnig unnið sambærilegum kjarakannanir fyrir Verslunarmannafélag Reykjavíkur og Samtök starfsmanna fjármálafyrirtækja. Þar hallar verulega á félagsmenn BHM því samanburður leiðir í ljós að heildarlaun háskólamenntaðra innan VR eru 10% hærri og heildarlaun háskólamenntaðra innan SSF heilum 22% hærri en heildarlaun félagsmanna BHM.

„Einnig kemur í ljós að vinnuvikan er lengri hjá BHM eða 46,1 klukkustund á móti 43,8 stundum hjá starfsmönnum fjármálafyrirtækja og 45 stundum hjá VR. Því er ljóst að aðildarfélög BHM hafa verk að vinna í kjarabaráttu komandi vikna enda er eitt helsta baráttumál samtakanna að öll háskólamenntun sé metin að verðleikum," samkvæmt tilkynningu.