„Skjólstæðingar okkar eru ekki með há lán þannig að það er ekki fyrr en hækkun á matarverði fer að skella á sem við förum að finna muninn,“ segir Vilborg Oddsdóttir, sem hefur umsjón með innanlandsaðstoð Hjálparstarfs kirkjunnar, aðspurð um það hvort þeim sem leita til þeirra eftir aðstoð hafi fjölgað í kjölfar efnahagskreppunnar. „Þetta er spurning um það þegar maturinn fer að hækka því það munar mikið um 5 til 10 þúsund krónur á mánuði hjá þeim sem eiga þær ekki til,“ bætir hún við.

Ásgerður Jóna Flosadóttir, forsvarsmaður Fjölskylduhjálpar Íslands, tekur undir orð Vilborgar. „Ég held að við komum til með að sjá núna í apríl, maí og júní alveg gríðarlega aukningu hjá okkur,“ segir Ásgerður Jóna en hún segir að rúmlega 700 fjölskyldur leiti aðstoðar hjá Fjölskylduhjálpinni á mánuði.

Aðalheiður Frantzdóttir, framkvæmdastjóri Mæðrastyrksnefndar Reykjavíkur, býst eins og Ásgerður Jóna við því að skjólstæðingum muni fjölga á næstu mánuðum. „Til okkar koma að jafnaði 160 til 170 manns í viku en ég gæti vel trúað að þeir verði orðnir 200 þegar líður á haustið,“ segir Aðalheiður.

Fjölgar jafnt og þétt

Aðalheiður segir að þeim sem sækja sér aðstoð til þeirra hafi fjölgað jafnt og þétt á undanförnum tveimur til þremur árum. Undir þetta tekur Ásgerður Jóna. „Það er alltaf að koma nýtt fólk til okkar,“ segir hún.

Stuðningur mikilvægur

Vilborg segist finna fyrir því að fyrirtæki séu farin að draga úr aðstoð sinni til félagasamtaka almennt. „Fyrirtæki gáfu áður matvörur sem voru að nálgast síðasta söludag, en þau eru eiginlega alveg hætt að gefa okkur það.“

Þær Aðalheiður og Ásgerður Jóna segjast ekki finna fyrir minni stuðningi og taka fram að stuðningur bæði hins opinberra og fyrirtækja verði mjög mikilvægur á næstunni.

Í hnotskurn

Fjölskylduhjálpin, Mæðrastyrksnefnd og Hjálparstarfið aðstoða öll bágstadda með matargjöfum á miðvikudögum. Fjölskylduhjálpin veitir einnig aðstoð við lyfjakaup og Hjálparstarfið læknisaðstoð og námsstyrki.