Hannes Hólmsteinn Gissurarson prófessor segist una þeim skilaboðum sem bréf háskólarektors beri með sér og segist hafa gert mistök við ritun 1. bindis ævisögu Halldórs Laxness.

„Ég tel að mistökin séu til að læra af þeim í stað þess að sýta þau eða afneita þeim,“ segir Hannes Hólmsteinn. „Eins og ég hef sagt opinberlega, og bauðst til þess eftir dóm héraðsdóms, þá ætla ég að gefa bókina út aftur endurskoðaða og fara eftir þeim ábendingum og gagnrýni sem komið hafa fram. Ef ég hef á einhvern hátt rýrt orðstír Háskóla Íslands, þá þykir mér það mjög leitt og ætla að gera mitt besta til að bæta úr því.“

Hannes Hólmsteinn segir sér til málsbóta, að hann hafi ekki vitað að hann væri að brjóta nein lög vísvitandi. Einnig að hann hafi endurbætt úrvinnslu og vinnubrögð sín við ritun 2. og 3. bindis ævisögunnar.

Hannes segir ekkert við bréf háskólarektors að athuga. Í bréfinu segir meðal annars að staðfesting Hæstaréttar á því að Hannes Hólmsteinn hafi brotið gegn höfundarrétti Halldórs Laxness sé áfall fyrir Háskóla Íslands.

Getur ekki metið hvort málið sé áfall fyrir HÍ

Spurður hvort hann sé sammála því að brotin séu áfall fyrir HÍ segir Hannes: „Ég get ekki metið það sjálfur hvort svo sé, en ef svo er, þá er það mjög miður,“ segir hann.

„Ég geri ráð fyrir að háskólarektor sé í betri aðstöðu til að meta það en ég,“ bætir hann við.

„Ég er ekki viss um að ég sé eini háskólaprófessorinn sem hafi einhverntíma gerst sekur um vinnubrögð sem má gagnrýna. Það er enginn fullkominn eða óskeikull.“

Í hnotskurn

» Siðanefnd Háskóla Íslands barst í apríl 2004 kæra Auðar Sveinsdóttur, ekkju Halldórs Lanxness, á hendur Hannesi Hólmsteini.
» Taldi kærandi að Hannes hefði brotið gegn höfundarrétti nóbelsskáldsins við gerð og útgáfu 1. bindis ævisögu hans. Siðanefnd vísaði málinu til þáverandi rektors og þá hafði kærandi höfðað dómsmál á hendur Hannesi Hólmsteini.
» Hæstiréttur dæmdi Hannes þann 13. mars sl. til að greiða Auði fébætur og málskostnað fyrir að hafa brotið gegn höfundarrétti Halldórs Laxness.