Baugur leitast við að hreinsa sig frá fasteignum og íslenskum bönkum, tveimur geirum sem eiga í erfiðleikum,“ segir í breska blaðinu Financial Times. Er þar vísað til eigna FL Group, sem Baugur seldi nýja fjárfestingarfélaginu Styrk Invest. „Breytingin fjarlægir Baug frá fjármálageiranum, þrátt fyrir að tengslin milli stjórnarformannsins og nýju félaganna séu enn óljós.“

Með þessum hreyfingum segir FT Baug skerpa áhersluna á fjárfestingar í smásölu eins og reyndar kom fram hjá félaginu sjálfu. Þá segir að Baugur undirbúi nú tilboð í bresku fatakeðjuna Moss Bros og íhugi að stækka hlut sinn í stórversluninni Saks í Bandaríkjunum.

Ekki sala, heldur endurskipulag

Í Times var hins vegar greint frá getgátum um að Baugur myndi selja núverandi hlut í Moss Bros. Aðgerðirnar voru sagðar endurspegla þá tilfinningu að „fjáðir frumkvöðlar og ránfuglar“ gætu hagnast á lægð lausafjárkreppunnar, enda hafi verið haft eftir Gunnari Sigurðssyni, forstjóra Baugs, að kauptækifæri lægju í núverandi markaðsaðstæðum.

Ummæli Svenns Dam, stjórnarformanns Nyhedsavisen, vöktu athygli en í samtali við viðskiptavef Jyllands-Posten sagðist hann ekki sjá að Íslendingarnir hefðu selt neitt, heldur hefðu þeir endurskipulagt. Líkt og hjá Baugi gegni Jón Ásgeir Jóhannesson einnig stjórnarformennsku hjá Stoðum Invest, sem keyptu 49% hlut Baugs í danska fríblaðinu. Tæplega sé því um eigendaskipti að ræða. Ennfremur verði engar mannabreytingar innan Nyhedsavisen eða Dagsbrun Media í Danmörku. Af dönskum eignum skiptir fjórðungshlutur FL Group í bruggfyrirtækinu Royal Unibrew, sem framleiðir m.a. Faxe-bjór, óbeint um hendur. Baugur mun hins vegar halda eftir Illum og Magasin du Nord, enda í takt við aukna áherslu á smásöluverslun.