Pastagerðarmaður í Pisa á Ítalíu. AP

Tollar á ófylltu pasta með eggjainnihaldi eru 8 krónur á kíló. Engir tollar eru á ófylltu pasta sem ekki inniheldur egg, að sögn Guðmundar Marteinssonar, framkvæmdastjóra hjá Bónus, sem kveðst ekki viss um skýringuna. „Það eina sem mér dettur í hug er að egg eru framleidd á Íslandi en ekki hveiti,“ segir Guðmundur.

Pasta er meðal þeirra vörutegunda sem utanríkisráðherra vill ekki tollmúra á. „Við getum ekki látið eins og rödd neytenda sé ekki til. Að mínu viti er ekki réttlætanlegt að halda uppi tollmúrum á pasta, kjúklingum og svínakjöti til þess að halda uppi verði á lambakjöti,“ sagði Ingibjörg Sólrún Gísladóttir á ársfundi Útflutningsráðs Íslands á mánudag.

Ólafur Friðriksson, skrifstofustjóri í sjávarútvegs- og landbúnaðarráðuneytinu, kveðst ekki vita hvers vegna hafi verið samið um tolla á pasta á sínum tíma.

Viðræður standa nú yfir við Evrópusambandið um gagnkvæmar lækkanir á landbúnaðarvörum, annars vegar mikið unnum vörum sem bera magntolla, eins og til dæmis pasta og tilbúnum pitsum, og hins vegar minna unnum vörum sem bera bæði verðtolla og magntolla. Vonast er til að niðurstaða fáist síðari hluta árs.

Ólafur leggur áherslu á að Ísland hafi ekki haft neinn gagnkvæman markaðsaðgang að ESB þegar samið var um núverandi tolla. ,,Núverandi sjávar- og landbúnaðarráðherra er harður á því að ekki eigi að semja einhliða um lækkun tolla og það er það sem við erum að gera. Við ætlum náttúrlega ekki að fara að veita einhliða markaðsaðgang hjá okkur nema fá e itthvað á móti.“

Í hnotskurn