Guðrún Bryndís Guðmundsdóttir, yfirlæknir BUGL, sagði að lengi hefði verið þörf á að auka og samhæfa þjónustu deildarinnar. Hlustað hefði verið á tillögur starfsfólks og í ágúst sl. fékkst aukið fjármagn. Í kjölfarið voru ráðnir fjórir nýir starfsmenn auk fræðslustjóra.

Starfsfólk BUGL hefur aukið vinnuálag undanfarna tvo mánuði og m.a. sett upp svonefnda „laugardagsklínik“. Þá hefur verið unnið utan hefðbundins vinnutíma til þess að taka við börnum af biðlista.

Á undanförnum tveimur mánuðum er búið að vinna um 22 mál af biðlistum umfram það sem ella hefði verið unnt að sinna. Um miðjan ágúst 2007, þegar ákveðið var að auka framlög til BUGL, voru 165 mál á biðlistanum en nú eru þau 107. Á þessum tíma hafa borist um 100 nýjar tilvísanir. Af þeim hafa bæst við um 80 ný mál á biðlistann. Í heild hafa því verið unnin tæplega 140 mál á rúmu hálfu ári. Guðrún sagði að miðað væri við að bið eftir þjónustu á borð við þá sem BUGL veitti væri um þrír mánuðir. Hún sagði starfsfólk BUGL hafa leitað leiða til þess að biðlistinn lengdist ekki aftur.

„Við höfum viljað leggja áherslu á samvinnu við aðrar stofnanir, bæði þjónustumiðstöðvar og heilsugæslu,“ sagði Guðrún. „Við viljum auka fræðslu til lækna í heilsugæslu og eins annarra sem koma að þjónustu við börn og unglinga með geðraskanir. Einnig kemur til greina að flytja úrræði sem við höfum hér til heilsugæslunnar þannig að hægt sé að nálgast vandann í nærumhverfi barnanna.“

Í janúar sl. fór af stað tilraunaverkefni þegar starfsfólk BUGL veitti starfsfólki heilsugæslustöðvarinnar á Egilsstöðum og öðrum þjónustuaðilum þar fræðslu. Einnig var haldið þjálfunarnámskeið fyrir foreldra barna með ofvirkni og athyglisbrest. Fyrirhuguð er aukin handleiðsla og ráðgjöf. Markmiðið er að heilsugæslustöðin verði þekkingarmiðstöð í sínum landsfjórðungi varðandi börn með geðraskanir. Þá er hafið samstarf við tvær heilsugæslustöðvar í Reykjavík og hefur teymum heilsugæslustöðva og þjónustumiðstöðva sem tengjast einstökum skólum verið veitt handleiðsla.