Nöfn frá vinstri til hægri: Dr. Inga B. Árnadóttir, leiðbeinandi og forseti tannlæknadeildar, Birgir Björnsson, Sólveig Anna Þorvaldsdóttir, Jóhanna Bryndís Bjarnadóttir, Heiðdís Halldórsdóttir, Ása Margrét Eiríksdóttir, Jón Hafliði Sigurjónsson, Dr. Peter Holbrook, prófessor og leiðbeinandi. mbl.is

Nemar á sjötta ári í tannlæknadeild Háskóla Íslands unnu fyrstu verðlaun í rannsóknarkeppni tannlæknanema í Norður-Evrópu um síðustu helgi í Kaupmannahöfn.  Sautján rannsóknarverkefni kepptu í  DENTSPLY keppninni, sem fer fram árlega í Kaupmannahöfn á ársþingi danska tannlæknafélagsins.

Samkvæmt upplýsingum frá tannlæknadeild Háskóla Íslands sýnir MUNNÍS, faraldsfræðirannsókn á tannheilsu barna og unglinga á Íslandi frá árinu 2005, að 37,3% 15 ára pilta eru með glerungseyðingu á byrjunarstigi.

Gosdrykkir eru taldir vera stór áhrifaþáttur og drekka íslenskir 15 -19 ára piltar að meðaltali um einn lítra af gosdrykkjum á dag.

Í tilkynningu frá tannlæknadeild segir að markmið rannsóknar tannlæknanema tannlæknadeildar Háskóla Íslands hafi verið að kortleggja íslenska gosdrykki, skoða hverjir þeirra eru mest glerungseyðandi og að geta bent fólki í landinu á hvaða drykkir eru í lagi fyrir glerung tanna og hverja þeirra á að forðast.

Þá kemur fram að niðurstaða rannsóknarinnar sýni að rotvarnarefnin sítrónusýra og fosfórsýra í íslenskum drykkjum valda glerungseyðingu en sjálft gosið hefur ekki áhrif.   Mikill munur er á milli tegunda og sýna niðurstöður að jafnvel drykkir, sem auglýstir eru sem heilsudrykkir, geta verið skaðlegri en aðrir.