Sendirinn á Steinnýjarstaðafjalli settur upp.

Síminn hefur kveikt á tveimur nýjum langdrægum GSM sendum, öðrum á Steinnýjarstaðafjalli á Skagaheiði og hinum á Þrándarhlíðarfjalli ofarlega í Skagafirðinum. Segir félagið að með þessu stækki þjónustusvæðið umtalsvert.

Sendirinn  á Steinnýjarstaðafjalli hefur um 100 km radíus og mun ná vestur á Strandir allt að Norðurfirði og í austurátt að Siglufirði. Sendinum er ætlað að þjóna strandlengjunni og miðunum og nær yfir Húnaflóa, ytri hluta Skagafjarðar og vel út á miðin þar í kring. Einnig má búast við tryggari sambandi á veginum á milli Hofsós og Siglufjarðar.

Sendirinn á Þrándarhlíðarfjalli nær til norðurhluta Kjalvegar allt að Hveravöllum, hluta af Arnarvatnsheiði og hluta af Skagafjarðarleið Sprengisandsvegar. 

Síminn gerir ráð fyrir að um mitt sumar verði búið að setja upp 28 nýja langdræga GSM senda út um allt land. Þessi áætlun sé liður í því að því að þétta og stækka GSM þjónustusvæði Símans auk þess sem undirbúningur fyrir uppbyggingu á 3G þjónustu á landsbyggðinni er kominn á fullt skrið.