Kópavogsbær býður leikskólastjórum og aðstoðarleikskólastjórum í leikskólum í rekstri bæjarins upp á stjórnendaþjálfun þeim að kostnaðarlausu. Markmiðið með stjórnendaþjálfuninni er að efla fjárhagslegt og faglegt sjálfstæði leikskólastjóra í daglegum rekstri, að því er fram kemur í fréttatilkynningu. 

Kópavogsbær leggur áherslu á að bjóða íbúum bæjarins upp á þjónustu í takt við þarfir þeirra. Mikilvægt er að starfsmenn leikskólanna vinni saman sem heild að sameiginlegum markmiðum bæjarins. Sterkari stjórnendur og ánægðari starfsmenn gera leikskóla bæjarins að betri vinnustöðum sem leiðir af sér fækkun veikindadaga og minni starfsmannaveltu.   

Stjórnendaþjálfunin verður á vegum Þekkingarmiðlunar sem hefur skipulagt fyrir Kópavogsbæ faglegt og metnaðarfullt nám sem spannar tvö misseri. Með verkefni af þessu tagi vill Kópavogsbær skipa sér meðal fremstu bæjarfélaga landsins á sviði þróunar, menntunar og fræðslumála. Í gær, fimmtudaginn 17. apríl, fór fram kynning í Gerðarsafni á stjórnendaþjálfuninni fyrir leikskólastjóra og aðstoðarleikskólastjóra í Kópavogi.