Eftir Elvu Björk Sverrisdóttur elva@mbl.is

 UM 30% frétta fjölmiðla um fólk af erlendum uppruna, sem hingað kemur til þess að vinna, voru í fyrra af neikvæðum toga. Þetta kemur fram í niðurstöðum greiningar fyrirtækisins Creditinfo á umfjöllun um innflytjendur og erlent vinnuafl. Niðurstöðurnar voru kynntar í gær á ráðstefnu um umfjöllun fjölmiðla um innflytjendur og afbrot, sem Alþjóðahús, Blaðamannafélag Íslands, Kópavogsbær og fleiri aðilar stóðu að. Um 15% fréttanna töldust mjög eða frekar jákvæðar.

Staðan var örlítið önnur þegar kom að fréttum fjölmiðla um innflytjendur. Þar reyndust um 30% fréttanna af jákvæðum toga en um 28% frekar eða mjög neikvæðar.

Rannveig Þórisdóttir, deildarstjóri upplýsinga- og áætlanadeildar lögreglunnar á höfuðborgarsvæðinu, fjallaði um afbrot útlendinga og velti því upp hvort þau væru öðruvísi en afbrot sem Íslendingar fremdu.

Fram kom í máli Rannveigar að hegningarlagabrotum á höfuðborgarsvæðinu hefur fækkað á árabilinu 2001-2007. „En hlutfall erlendra ríkisborgara sem fremja slík brot jókst meira á árinu 2007 en hlutfall Íslendinga,“ segir Rannveig. Væntanlega sé hluti skýringarinnar að útlendingum hefur fjölgað hér á landi.

Helgi sagði að margir hér á landi hefðu áhyggjur af því að vaxandi straumur útlendinga hingað til lands myndi síðar leiða til hærri glæpatíðni „og að samfélagið muni breytast til hins verra. En við megum í þessu samhengi ekki gleyma afbrotum sem útlendingar verða fyrir í okkar samfélagi vegna uppruna síns,“ sagði Helgi og benti á að hatursglæpir hefðu víða skapað vanda erlendis.

Hann vék að fjölmiðlum og sagði að spyrja þyrfti hvort framsetning þeirra á fréttum ýtti undir tortryggni gagnvart útlendingum, sem næði einnig til löggæslunnar. „Fylgjumst við meira með útlendingum en öðrum. Lenda þeir frekar í prófíl?“ spurði Helgi. Hann minnti á að innflytjendur á Íslandi kæmu hingað að mestu leyti til vegna frumkvæðis héðan. „Þannig að ábyrgð á meðferð þeirra hlýtur líka að liggja að miklu leyti hjá okkur sjálfum.“