Á ársfundi Landbúnaðarháskóla Íslands í Stykkishólmi á dögunum voru undirritaðir samstarfssamningar við Náttúrufræðistofnun Íslands, Samtök náttúrustofa á Íslandi og Landmælingar Íslands. Ágúst Sigurðsson, rektor LbhÍ, segir að þessir samningar séu Landbúnaðarháskóla Íslands afar mikilvægir, í þeim sé verið að koma samstarfinu í fastar skorður og fitja upp á nýjungum.

Í samningi LbhÍ og Náttúrufræðistofnunar Íslands segir að markmið samningsins sé að stuðla að samstarfi LbhÍ og NÍ um fræðslu, menntun og rannsóknir á sviði náttúrufræða og sjálfbærrar náttúruverndar. Þá kemur fram að stefnt sé að því að LbhÍ beini nemendum sínum í auknum mæli til NÍ og að sérfræðingar stofnunarinnar komi að leiðsögn nemenda í rannsóknanámi og kennslu við skólann. Einnig er stefnt að átaki í endurmenntun auk þess sem sérfræðingar NÍ, sem sinna kennslu í miklum mæli hjá LbhÍ, eiga kost á því að hljóta akademíska nafnbót (lektor/dósent/prófessor) við LbhÍ að undangengnu dómnefndarmati.

Í samningi Landmælinga Íslands og LbhÍ segir að menntun sérfræðinga á sviði landmælinga sé hagsmunamál LMÍ og LbhÍ. Fram kemur m.a. að stefnt verði að því að koma á rannsóknaverkefnum til M.Sc. og Ph.D. gráðu á ábyrgð og með leiðsögn beggja stofnana á sérsviðum LMI. Þá er einnig kveðið á um gagnkvæm afnot af gagnagrunnum.

Í samningi LbhÍ og Samtaka náttúrustofa á Íslandi segir að LbhÍ geti leitað til starfsmanna SNS um kennslu og til að leiðbeina nemendum í verkefnum þeirra. Þá býðst nemendum LbhÍ að taka þátt í náttúrufarskönnun SNS þar sem þeir leggja fram aðstoð við gagnaöflun undir leiðsögn starfsmanna SNS.