Ingibjörg nefndi þetta í ræðu sinni á ársfundi Útflutningsráðs en ekki hefur verið ákveðið hvar vista eigi verkefnið Promote Iceland. Hún sagði það skoðun sína að í samræmingu aðgerða og upplýsingagjafar stjórnvalda ætti Útflutningsráð að leika aukið hlutverk. Ráðið hefði eflst á undanförnum árum og þá einkum eftir að samstarfið við utanríkisráðuneytið var aukið.

Ímyndarnefndin lagði til meiri skilvirkni og Ingibjörg sagði utanríkisráðuneytið ætla að bregðast við því þegar á þessu ári. Sameina ætti skrifstofu menningar- og upplýsingamála og skrifstofu viðskiptaþjónustu og ferðamála (VUR). Þá yrði starfssvið viðskiptafulltrúanna, sem eru alls 10, skerpt og það með skýrari hætti látið ná til menningar-, landkynningar- og ímyndarmála.

Ingibjörg Sólrún benti í sinni ræðu jafnframt á þær tillögur ímyndarnefndarinnar, sem Svafa Grönfeltd leiddi, að svæðisskrifstofur Ferðamálastofu í Frankfurt, Kaupmannahöfn og New York yrðu lagðar niður í núverandi mynd og sú starfsemi tvinnuð annarri kynningarstarfsemi á vegum stjórnvalda í viðkomandi borgum. Ingibjörg sagði Össur Skarphéðinsson iðnaðarráðherra fyrir sitt leyti hafa lýst því yfir að hann vildi eiga meira samstarf við utanríkisþjónustuna um landkynningarmál en verið hefði.

Ólöf Ýrr Atladóttir ferðamálastjóri segir að skýrsla ímyndarnefndarinnar hafi verið mjög tímabær. Í skýrslunni birtist lýsing á brotakenndri mynd íslenskra kynningarmála, sem ljóst sé að þurfi að samstilla og setja í skilvirkari farveg.

„Sú tillaga nefndarinnar að koma á fót vettvangi þar sem aðilar sem málið varða myndu starfa saman að því að móta, styrkja og koma á framfæri skýrri, jákvæðri ímynd af landi og þjóð, er vissulega áhugaverð,“ segir Ólöf en telur ekki tímabært að ákveða hér og nú hvar vista eigi verkefnið Promote Iceland. Eftir sé að ákveða hvort þessi leið verði farin og hvernig hún verði útfærð.

„Hins vegar er ég alveg sammála því að betur þurfi að stilla saman strengi í landkynningarmálum. Ég tel að margvíslegar leiðir séu færar og er Ferðamálastofa algjörlega reiðubúin að koma að þeirri nauðsynlegu umræðu sem nú fer í gang um þessi mál, enda íslensk ferðaþjónusta í gegnum tíðina öflugasti vettvangur almennrar landkynningar. Í mínum huga er því alveg ljóst að atvinnugreinin mun áfram þurfa öflugan málsvara og sterka aðkomu í markaðssetningu landsins á erlendri grundu,“ segir Ólöf Ýrr.