Verið er að undirbúa kæru fyrir hönd Samfés, samtaka félagsmiðstöðva á Íslandi, á hendur fyrrum framkvæmdastjóra þess fyrir að draga að sér 2.113.178 krónur.

Upp um athæfið komst síðasta sumar, er framkvæmdastjórinn lét af störfum. Í fyrstu var talið að um rúma milljón væri að ræða og var gert samkomulag við framkvæmdastjórann fráfarandi um að hann greiddi peninginn til baka. Við nánari eftirgrennslan varð hins vegar ljóst að um mun hærri upphæð væri að ræða.

Málið var kynnt aðilum samtakanna á aðalfundi sem haldinn var á Akureyri 17. apríl sl. Þar kom m.a. fram að málið hefur þegar verið tilkynnt lögreglu en samkvæmt upplýsingum frá Samfés er lögfræðingur samtakanna að vinna að kæru vegna málsins sem verður formlega send lögreglu í næstu viku.

Fjárdáttur komið upp áður

Svipað atvik hefur áður komið upp innan samtakanna. Í aðdraganda aðalfundar árið 2004 kom í ljós að þáverandi framkvæmdastjóri hafði dregið að sér um það bil 5 milljónir króna. Þá var málið leyst án kæru, og framkvæmdastjórinn greiddi til baka það fé sem hann hafði tekið.

Ólafur Þór Ólafsson, fyrrverandi formaður Samfés, segir að vinnuferlar hafi verið endurskoðaðir eftir að upp um fjárdráttinn komst árið 2004. „En þrátt fyrir þær reglur sem settar voru þá voru holur í kerfinu sem hægt var að nýta sér. Nú hefur hins vegar verið stoppað í þær og nýtt verklag tekið í notkun sem unnið hefur verið eftir í vetur.“