Framkvæmdir eru hafnar við tónlistarhús við Reykjavíkurhöfn. mbl.is/RAX

Hæstiréttur hefur hafnað þeirri kröfu Eignarhaldsfélagsins Portus, Reykjavíkurborgar og Ríkiskaupa að fella skuli úr gildi úrskurð úrskurðarnefndar um upplýsingamál. Með úrskurðinum var Reykjavíkurborg og Ríkiskaupum gert skylt að veita Fast­eign og Klasa aðgang að samningi við Portus um byggingu tónlistarhúss og ráðstefnumiðstöðvar á austurbakka Reykjavíkurhafnar en fyrirtækin tvö tóku þátt í forvali vegna tónlistarhússins.

Austurhöfn-TR ehf., sem er í eigu íslenska ríkisins og Reykjavíkur­borgar, gerði samning við Portus í mars árið 2006 um byggingu tónlistarhúss. Í kjölfarið óskuðu hin Fasteign og Klasi eftir því að fá afrit af samningnum en því var synjað. Synjunin var kærð til úrskurðarnefndar um upplýsingamál sem kvað upp þann úrskurð, að skylt væri að veita fyrirtækjunum aðgang að samningnum.

Portus, Reykjavíkurborg og Ríkiskaup töldu úrskurðinn ólögmætan og kröfðust þess fyrir dómi að hann yrði felldur úr gildi á þeim forsendum, að í samningnum komi fram upplýsingar um atvinnu- og viðskiptaleyndarmál Portus. Að auki væri þar að finna ýmsar upplýsingar, sem varða mikilvæga fjárhags- og viðskiptahagsmuni sam­starfs­aðila félagsins, svo sem hönnuða og listamanna.

Héraðsdómur Reykjavíkur og síðan Hæstiréttur féllust hins vegar ekki á þessi sjónarmið. Vísar Hæstiréttur m.a. til þess, að samningurinn falli undir gildissvið upplýsingalaga og rökstuðningur úrskurðarins fullnægi þeim kröfum, sem gerðar verði til rökstuðnings úrskurða nefndarinnar. Segir Hæstiréttur ekki á færi dómstóla, að fjalla um takmörkun á upplýsingarétti vegna einkahagsmuna eða leggja mat á þýðingu trúnaðarákvæða í samningnum en samningurinn var ekki lagður fram í málinu.

Hæstiréttur klofnaði í málinu og taldi einn dómari af fimm, Jón Steinar Gunnlaugsson, að Portus þurfi að una því að Fast­eign og Klasi  fái aðgangur að samningi Portus við Austurhöfn-TR.