Hafnarfjörður stefndi í gær Orkuveitu Reykjavíkur (OR) til greiðslu um 7,7 milljarða króna auk dráttarvaxta fyrir 14,6 prósenta hlut bæjarins í í Hitaveitu Suðurnesja (HS).

Til vara gerir Hafnarfjörður kröfu um að OR verði dæmt til að greiða 1,1 milljarð króna auk dráttarvaxta í skaðabætur vegna vanefnda OR á kaupsamningnum „verði það svo ólíklega niðurstaða dómsins að samningur aðila sé af einhverri ástæðu ekki skuldbindandi,“ líkt og segir í stefnu Hafnfirðinga.

Stefnan liggur nú hjá dómstjóra sem ákveður hvort málið fær flýtimeðferð fyrir dómstólum. Heimildir 24 stunda herma að sú niðurstaða liggi fyrir á föstudag.

Telja úrskurðinn vandamál OR

Samkeppniseftirlitið úrskurðaði nýverið að OR mætti ekki eiga meira en þrjú prósent í HS. Fyrirtækið á nú þegar um 16,6 prósent og því ljóst að því er ómögulegt að bæta við sig 14,6 prósenta hlut Hafnfirðinga. Forsvarsmenn OR hafa litið svo á að úrskurður Samkeppnisyfirvalda ógildi kaupsamninginn við Hafnarfjörð þar sem hann sé lögbrot, en Hafnfirðingar eru því allskostar ósammála og telja úrskurðinn vera vandamál OR. Hjörleifur Kvaran, forstjóri OR, sagði í 24 stundum á þriðjudag að hann muni leggja til við stjórn fyrirtækisins að úrskurðurinn verði kærður.

Langt yfir raunvirði

Krafa Hafnfirðinga byggir á samningi sem málsaðilar gerðu sín á milli í júlí síðastliðnum. Hafnfirðingar höfðu tíma fram að áramótum til að ákveða hvort þeir ætluðu að nýta sölurétt sinn og gerðu slíkt um miðbik desember. Samkvæmt samkomulaginu átti OR að kaupa hvern hlut á genginu 7,0. Áður en Hafnfirðingar tóku ákvörðun um söluna létu þeir Askar Capital vinna verðmat á hlut sínum, en samkvæmt því mati var raunvirði hlutar í HS 4,7. Þeir 7,7 milljarðar sem OR á að greiða eru því rúmlega 2,5 milljörðum yfir raunvirði.

Í hnotskurn

Þegar Hafnarfjörður gerði samning um sölurétt á hlut sínum í HS til OR lá fyrir tilboð í hlutinn frá Geysi Green Energy á genginu 7,1 á hvern hlut. Hafnfirðingar ákváðu hins vegar að selja OR frekar þrátt fyrir að tilboð hennar hafi verið 0,1 lægra á hvern hlut.