Borgarráð samþykkti í dag þá niðurstöðu skipulagsráðs að hafna uppbyggingarhugmyndunum  við Keilugranda 1 og fól skipulagsstjóra að vinna með umsækjendum að nýjum hugmyndum í þeirra stað.

Að sögn Dags B. Eggertssonar, Samfylkingu, var áður kynntar hugmyndir meirihlutans um mjög róttæka uppbyggingu við Keilugranda 1. „Það er í samræmi við afstöðu Samfylkingar og VG við vinnslu málsins en það fór í auglýsingu í andstöðu við fulltrúa flokkana," samkvæmt upplýsingum frá Degi.

Svipaða sögu er að segja af Lindargötu. Þar hafði verið auglýst að hverfisvernd á þremur húsum yrði felld niður. Því var hafnað og því verður áfram staðinn vörður um götumyndina.

Í þriðja lagi var samþykkt að auglýsa tillögu um flutning gamalla húsa á Ingólfstorg en tekist hefur að koma til móts við sjónarmið tónleikahaldara með byggingu NASA neðanjarðar í hinu nýja uppbyggingarverkefni. Er það í samræmi við sameiginlegan metnað meiri- og minnihluta í skiplagsráði og þann undirbúning sem átti sér stað í tíð hundrað daga meirihlutans, samkvæmt upplýsingum frá oddvita Samfylkingarinnar í borgarstjórn.