Ákveðið hefur verið að hefja samningaviðræður við Ístak um tvöföldun Reykjanesbrautar þar sem tilboð Adakris uab./Toppverktakar ehf. sem hljóðaði upp á 699 milljónir uppfyllti ekki þau skilyrði sem sett voru, samkvæmt upplýsingum frá Vegagerðinni. Ístak bauð 807 milljónir króna í verkið.

Sjö tilboð bárust í útboði Vegagerðarinnar en verkið var boðið út á ný eftir að fyrri verktaki varð að segja sig frá því. Samkvæmt útboðinu á brautin að vera aksturshæf 16. október en fullbúin fyrir 1. júní á næsta ári.

Áætlaður kostnaður við verkið er 770 milljónir króna. Sex tilboðanna sem bárust voru hærri en eitt lægra. Tilboðin voru eftirtalin:

Malbikunarstöðin Hlaðbær–Colas hf. 969 milljónir, Íslenskir aðalverktakar hf. 955 milljónir, Glaumur og Árni Helgason 918 milljónir, Loftorka ehf. og Suðurverk hf. 847 milljónir, Háafell ehf. 842 milljónir, Ístak hf. 807 milljónir og Adakris uab./Toppverktakar ehf. 699 milljónir.

„Vegagerðin hefur hafnað tilboði Adakris uab / Topp verktaka ehf. í verkið. Eftir að tilboðin höfðu verið yfirfarin og leiðrétt eftir því sem við átti kom í ljós að verktakinn Adakris uab / Topp verktaka ehf. uppfyllti ekki kröfur Vegagerðarinnar og því ekki unnt að semja við hann," samkvæmt tilkynningu.