Elsa B. Friðfinnsdóttir, formaður Félags íslenskra hjúkrunarfræðinga. mbl.is/Golli

Hjúkrunarfræðingar og geislafræðingar sem sögðu upp um mánaðamótin munu hittast á morgun og fara yfir tilboð forsvarsmanna Landspítala um að fresta gildistöku nýs vaktakerfis fram til 1. október. Formaður Félags íslenskra hjúkrunarfræðinga vonast til að málin skýrist eftir fundinn.

„Hjúkrunarfræðingar funda á morgun og ég geri ráð fyrir að eftir þann fund skýrist þeirra afstaða eða hvort þeirra afstaða breytist eitthvað í ljósi þessarar frestunar frá spítalans hálfu," sagði Elsa B. Friðfinnsdóttir formaður félagsins.

„Það má ekki seinna vera að eitthvað fari að gerast því eftir morgundaginn er bara einn dagur til stefnu," sagði Elsa í samtali við Fréttavef Morgunblaðsins.

Í tilkynningu frá Landspítala segir, að vegna sjónarmiða, sem fram hafi komið um að starfsmenn fái lengri tíma til samráðs og til að koma sjónarmiðum sínum á framfæri, hafi verið ákveðið að fresta gildistöku nýs vaktakerfis, sem átti að taka gildi um mánaðamótin, til 1. október. Jafnframt sé höfð til hliðsjónar sú áskorun, sem Félag íslenskra hjúkrunarfræðinga setti fram um lengri tíma til að tryggja samráðsferil milli stjórnenda og starfsmanna.