Kynferðisbrotadeild lögreglunnar á höfuðborgarsvæðinu bárust fyrir helgi nýjar kærur á hendur rúmlega fimmtugum karlmanni sem grunaður er um ítrekuð kynferðisbrot gegn börnum sem öll tengjast honum fjölskylduböndum.

Upphaflega barst lögreglunni kæra frá barnaverndarnefnd vegna gruns um að maðurinn hafi brotið gegn tveimur ungum dætrum sínum en gæsluvarðhald vegna þeirrar kæru rennur út í dag.

Sótt hefur verið um tveggja vikna framlengingu á gæsluvarðhaldinu í ljósi þess að fleiri kærur á hendur manninum hafa borist og er verið að taka þá beiðni fyrir í Borgardómi Reykjavíkur en úrskurður liggur ekki fyrir.

Björgvin Björgvinsson yfirlögregluþjónn hjá kynferðisbrotadeild vill ekki tjá sig frekar um málið að svo stöddu en í kvöldfréttum Rúv kom fram að nú sé maðurinn einnig sakaður um að hafa brotið gegn fósturdóttur sinni og vinkonu dóttur sinnar. Stúlkurnar munu vera á aldrinum 10 til 14 ára.

Þá mun sonur mannsins frá fyrra hjónabandi og yngri systir hans hafa gefið sig fram við lögreglu og kært manninn fyrir kynferðisbrot sem hann framdi þegar þau voru börn.

„Það er verið að vinna í þessu máli og það hafa bæst við kærur og það er verið að skoða þetta í heild sinni og við vonumst til að geta gert það á næstu tveimur vikum, þetta er náttúrulega forgangsmál," Björgvin í samtali við Fréttavef Morgunblaðsins.

Maðurinn er sem stendur í haldi á Litla Hrauni.