Frá fundi öryggisráðs SÞ. Reuters

Ban Ki-Moon, framkvæmdastjóri Sameinuðu þjóðanna, hefur sent frá sér yforlýsingu þar sem hann segist ekki hafa hvatt aðildarríki SÞ og sendimenn til að styðja framboð Austurríkis til öryggisráðs SÞ. Segir Ban að öll ríkin  þrjú sem sækjast eftir sæti í ráðinu: Ísland, Austurríki og Tyrkland, séu öll fullkomlega hæf til að axla þá ábyrgð.

„Framkvæmdastjórinn veit að Austurríki, Ísland og Tyrkland sækjast eftir þessum tveimur sætum á tímabilinu 2009-2010. Hann gerir sér grein fyrir því að ríkin eru öll fullkomlega hæf til að taka þessi sæti og óskar þeim öllum góðs gengis við að afla sér stuðnings aðildarríkjanna. Sem framkvæmdastjóri vill hann ekki lýsa yfir stuðningi við eitt ríki umfram annað," segir í yfirlýsingunni, sem talsmaður Bans sendi frá sér. 

Málið snýst um ummæli, sem austurríska tímaritið Profil hafði eftir Ban þegar hann var nýlega í heimsókn í Evrópu. Sagðist Ban þá vona, að Austurríki yrði kjörið í öryggisráðið.

Bæði Íslendingar og Tyrkir tóku þetta óstinnt upp. Hafði Fréttablaðið m.a. eftir Kristínu Á. Árnadóttur, sem vinnur að framboði Íslands fyrir utanríkisráðuneytið, að ef rétt væri haft eftir framkvæmdastjóranum væri um að ræða mál sem snerti ekki aðeins Ísland heldur einnig öll önnur aðildarríki SÞ, sem hlytu að gera þá kröfu að framkvæmdastjórinn sýndi fyllsta hlutleysi. 

Hans Winkler, skrifstofustjóri austurríska utanríkisráðuneytisins, sagði að Ban hefði persónuleg tengsl við landið vegna þess að hann var um tíma sendiherra Suður-Kóreu í Austurríki. Þess vegna hefði hann lýst sinni persónulegu skoðun í viðtalinu en ekki opinberri skoðun framkvæmdastjóra SÞ.