Mikill samdráttur varð á sölu nýrra bíla hér á landi í apríl miðað við sama mánuð í fyrra. Brimborg var eina bílaumboðið sem jók sölu sína á milli ára. Samkvæmt samantekt Umferðarstofu á bílasölunni í apríl seldust samtals 743 bílar í mánuðinum en í apríl í fyrra seldust 1.328 nýir bílar. Salan dróst því saman um 44,1% á milli mánaða og má telja það til marks um aukna svartsýni neytenda. Frá áramótum hefur sala nýrra bíla dregist saman um 6,9% miðað við sama tíma í fyrra. Nú seldust 4.682 bílar en í fyrra 5.030.

Þegar litið er á sölu einstakra umboða má sjá að sala Brimborgar jókst um 21,6% á milli ára en sala annarra dróst saman. Mestur varð samdrátturinn hjá Toyota en umboðið seldi í apríl 96 nýja bíla (Toyota og Lexus), samanborið við 303 í fyrra. Einnig varð mikill samdráttur hjá Heklu sem seldi 103 bíla í apríl en 320 í fyrra (í þeim tölum er sala Heklu, Kia og Öskju saman).

Brimborg var einnig það bílaumboð sem átti stærsta markaðshlutdeild í apríl, 21,9%, en Ingvar Helgason átti 20,5% hlutdeild.