Vonast er til að stjórnklefi Gullfaxa, fyrstu þotu Íslendinga, sem notuð var frá 1967 til 1985, verði færður á Flugsafn Íslands í júní næstkomandi. Vélin er nú á flugvellinum í Roswell í Nýju-Mexíkó og var hafist handa við að skera stjórnklefann frá búk vélarinnar á þriðjudaginn. Þess má geta að Roswell er endastöð flestra flugvéla sem þangað koma og eru þar starfrækt nokkur fyrirtæki sem sérhæfa sig í að rífa flugvélar. Eru þar nú vel á annað hundrað flugvéla og fæstar munu þær nokkurn tíma fljúga aftur.

Reiknað er með að allt verði frágengið um helgina og að stjórnklefi Gullfaxa geti lagt af stað á palli vörubíls í næstu viku til Richmont í Virginíuríki í Bandaríkjunum. Þaðan á að flytja hann með skipi til Íslands.

Icelandair borgar fyrir stjórnklefann og Eimskip gefur flutninginn til Íslands og loks til Akureyrar á Flugsafnið.

Hafþór Hafsteinsson, stjórnarformaður Avion Aircraft Trading, er einn aðalstuðningsaðili safnsins. Hefur hann haft veg og vanda af björgun þotunnar fyrir Flugsafnið. Liðlega eitt ár er liðið frá því undirbúningur hófst að því að fá til landsins einhvern hluta vélarinnar til varðveislu.

Gullfaxi er af gerðinni Boeing 717-108C og bar einkennisstafina TF-FIE og var í notkun Flugfélags Íslands frá júní 1967 og síðar Flugleiða/Icelandair fram til 1985. Stjórnklefi vélarinnar verður til sýnis á Flugsafninu en þar er verið að undirbúa sýningarbás með myndum og munum tengdum upphafi þotualdar á Íslandi.