Eftir Ómar Friðriksson omfr@mbl.is

 Óhætt er að fullyrða að frumvarpið um lögfestingu á matvæla- og fóðurlöggjöf ESB, sem Alþingi hefur nú til meðferðar, sé einn af viðamestu lagabálkum sem komið hafa til kasta þingsins að undanförnu. Frumvarpið, sem er um 60 blaðsíður, felur í sér innleiðingu fjölmargra Evrópureglugerða og hefur sjávarútvegs- og landbúnaðarnefnd Alþingis leitað umsagna nálægt 130 aðila við það. Fram hefur komið að fylgja þarf frumvarpinu eftir með setningu reglugerða um á fimmta tug efnisatriða.

Frestur til að skila umsögnum við frumvarpið rennur út í dag og blasir við að nefndarmanna sjávarútvegs- og landbúnaðarnefndar bíður ærið verkefni að fara yfir flóð umsagna og athugasemda. „Það verður hörkuvinna,“ segir Arnbjörg Sveinsdóttir, formaður nefndarinnar. Fram hefur komið hörð gagnrýni á frumvarpið en að sögn Arnbjargar koma stærstu áhyggjurnar frá sláturleyfishöfum, afurðastöðvum og framleiðendum hvíta kjötsins, þ.e. kjúklinga- og svínabændum.

Bændasamtök Íslands hafa nú ákveðið að senda ekki inn umsögn við frumvarpið heldur fær þingnefndin væntanlega erindi í dag þar sem BÍ krefjast þess að fá lengri frest til að fara yfir frumvarpið og rökstyðja þá afstöðu með greinargerð til nefndarinnar.

„Við teljum ekki hægt að gefa ábyrga umsögn á svo skömmum tíma,“ segir Eiríkur Blöndal, framkvæmdastjóri BÍ. „Það er ekki einfalt mál að rekja sig eftir Evrópurétti, þetta tekur einfaldlega lengri tíma. Okkar afstaða er sú að við getum ekki fellt okkur við að [frumvarpið] verði samþykkt í vor, vegna þess að við þurfum lengri tíma til að gefa ábyrga umsögn.“

Veigamesta breytingin felst eins og fram hefur komið í að ekki verður lengur bannaður innflutningur á fersku kjöti. Markmið þess er þó allt annað en að auka viðskipti milli landa með matvörur og er fyrst og fremst að stuðla að auknu fæðuöryggi og treysta hagsmuni neytenda. Í umfjöllun Matvælastofnunar segir að rannsóknir á ferskum vörum nái ekki að útiloka að einhver mengun geti verið til staðar. Því sé nauðsynlegt að halda uppi stöðugu eftirliti og taka sýni til rannsókna.