Ólafur F. Magnússon borgarstjóri hefur boðað verulegar útlitsbreytingar á horni Austurstrætis og Lækjargötu og Laugavegi 4-6 eftir næsta vetur að undangengnum framkvæmdum við þessa staði og raunar víðar. Umræður um miðborgarmál í borgarstjórn stóðu enn yfir þegar klukkan nálgaðist miðnætti í gær.

Borgarstjóri sagði að umræddir staðir hefðu sérstaka táknræna þýðingu fyrir átak í uppbyggingu í miðborginni. Framkvæmdir við staðina yrðu komnir það langt á næsta ári að útlit þeirra og nærliggjandi svæða yrði verulega breytt frá því sem nú er. „Það er ekkert nýtt að fólki finnist að ástand miðborgarinnar gæti verið betra,“ sagði Ólafur. Hann sagði að áhugi Íslendinga á miðborginni endurspeglaðist í því að komnar væru fram 230 ábendingar á vefnum 1,2 og Reykjavík um hvað mætti betur fara. „Langflestar ábendingarnar snúa að því að bæta megi hreinsun og hverskonar umhirðu í bænum. Borgaryfirvöld hafa brugðist við þessum ábendingum með því að taka til hendinni í miðborginni.“