Hæstiréttur þyngdi í dag dóm Héraðsdóms Austurlands frá því í júlí í fyrra yfir karlmanni fyrir nauðgun. Í héraðsdómi var maðurinn dæmdur í átján mánaða fangelsi en Hæstiréttur þyngdi dóminn um sex mánuði.

Bjarni Tryggvason var í Hæstarétti í dag dæmdur í tveggja ára fangelsi fyrir kynferðisbrot gagnvart konu með því að hafa haft samræði við hana á meðan hún gat ekki spornað við verknaðinum sökum ölvunar og svefndrunga.

Í héraðsdómi, sem staðfestur var um sakfellingu ákærða, var talið sannað með vísan til trúverðugs framburðar konunnar, áverka þeirra sem hún bar á kynfærum og endaþarmi og framburðar læknis um að þeir gætu samrýmst harkalegum eða óundirbúnum samförum, framburðar vitna um ástand konunnar og þeirra sálrænu einkenna sem hrjáðu hana eftir atburðinn að maðurinn hefði framið verknað þann sem ákært var fyrir. Var hann dæmdur í 2 ára fangelsi og til að greiða konunni 833.207 krónur í miskabætur.