Heimsókn Friðriks, krónprins Danmerkur, og eiginkonu hans, Maríu krónprinsessu, lauk í dag en þau komu til landsins mánudaginn 5. maí í boði forseta Íslands, Ólafs Ragnars Grímssonar, og Dorrit Moussaieff forsetafrúar.

Þau heimsóttu Bessastaði á komudeginum og snæddu hádegisverð þar í boði forsetahjónanna. Þá heimsóttu þau Áslandsskóla í Hafnarfirði þar sem kennarar og nemendur tóku á móti þeim og kynntu dönskukennslu og annað starf í skólanum.

 Á þriðjudeginum heimsóttu þau m.a. Dalland og fóru hjónin í reiðtúr ásamt forsetahjónunum. Þar voru íslenskir gæðingar sýndir og meðal annars riðu knapar með bjórglas í hendi til að sýna hversu mjúkt og lipurt töltið er í íslenska hestinum.  Krónprinshjónin snæddu svo hádegisverð á Þingvöllum í boði Geirs H. Haarde forsætisráðherra.

Á miðvikudaginn var haldið til Stykkishólms og heimsóttu krónprinshjónin m.a. grunnskólann þar og Norska húsið. Deginum lauk með siglingu um Breiðafjörð.

Í morgun heimsóttu þau Íslenska erfðagreiningu þar sem starfsemin var kynnt fyrir þeim. Þau enduðu svo dvöl sína á að heimsækja danska sendiráðið.  Almennt virtust þau Friðrik og María vera ánægð með heimsókn sína og vel lá á þeim þegar þau stigu upp í vél sína á Reykjavíkurflugvelli.