Eftir Önund Pál Ragnarsson onundur@mbl.is

Ólafur F. Magnússon borgarstjóri mun leggja það til við Jakob Frímann Magnússon, nýráðinn framkvæmdastjóra miðborgar, að hann segi sig úr bæði hverfisráði miðborgar og ferða- og menningarmálaráði. Þetta segir hann í samtali við Morgunblaðið, en Ólafur var í gær gagnrýndur vegna umdeildrar ráðningar Jakobs Frímanns. Rætt var um málið í borgarráði og birtust bæði yfirlýsingar úr röðum minnihlutans og frá borgarstjóra seinni partinn í gær. Spurði minnihlutinn m.a. út í ráðningarferlið, launaupphæðir og hvernig hið nýja starf samræmist setu Jakobs í ráðum á vegum borgarinnar, en starfið var hvorki auglýst né um það fjallað í borgarráði.

Fram kom hjá Ólafi í gær að föst mánaðarlaun Jakobs eru kr. 474.214 og föst yfirvinna kr. 236.286 eða alls 710.600 krónur. Tók hann fram að þetta væri sama upphæð og framreiknuð laun miðborgarstjóra R-listans á árinu 2005. Borgarstjórinn hafnar því alfarið að hið nýja embætti hafi verið sérsniðið fyrir Jakob Frímann. „Fátt sannar það betur en sú staðreynd að rætt var við fleiri aðila áður en til ráðningar hans kom, þ. á m. Kristínu Einarsdóttur, fyrrverandi miðborgarstjóra.“

Aðspurður hvers vegna staða framkvæmdastjórans hafi ekki verið auglýst segir Ólafur ráðninguna innan marka reglna borgarinnar, enda aðeins til tólf mánaða í mesta lagi. Mikið hafi legið á að hefja viðkomandi verkefni. Hann kveðst ekki hafa á takteinum hversu mikið þetta hefði tafist með auglýsingarferli og umfjöllun í borgarráði, en spurður hvaða verkefni framkvæmdastjórans það væru sem þyldu enga bið segir Ólafur: „Að samþætta vinnu og aðkomu starfsfólks að þeim gríðarlega miklu verkefnum sem blasa við í miðborginni, allt frá hreinsun, umhirðu, eftirliti og eflingu mannlífs til skipulagsvinnu. [...] Ég hef lagt feiknalega áherslu á endurreisn miðbæjarins á öllum Laugavegi og niður í Kvosina. Ég tel að ég hafi fundið einstakling sem ég treysti til að knýja verkefnið sem hraðast áfram,“ segir Ólafur.