Bæjarráð Kópavogs samþykkti á fundi sínum í gær að endurskoða kjör skuldabréfa og staðgreiðsluafslátt vegna úthlutunar á byggingarétti í Vatnsendahlíð síðastliðið haust. Tilgangurinn er að bregðast við breyttu efnahagsástandi.

Fram kemur í fréttatilkynningu að í tillögu meirihlutans í bæjarráði, sem samþykkt var einróma, segi meðal annars: „Í ágúst á síðasta ári var tekin sú ákvörðun af hálfu bæjarráðs að auglýsa til úthlutunar byggingarrétt fyrir íbúðarhúsnæði í Vatnsendahlíð í Kópavogi. Þann 13. nóvember sl. fór úthlutun fram í bæjarráði."

Frá úthlutun hafi aðstæður á lána- og fasteignamarkaði gjörbreyst. Slíkar breytingar hafi ekki verið fyrirsjáanlegar við töku ákvörðunar um úthlutun og hafi þær því komið niður á lóðarhöfum.

Vegna þeirra miklu breytinga sem orðið hafa á efnahagsástandi sé því lagt til að farið verði í endurskoðun á lóðarkjörum með tilliti til þess hvort unnt sé að koma til móts við lóðarhafa með bættum kjörum, með því að kjör skuldabréfa og staðgreiðsluafsláttur verði endurskoðuð.

Ákvörðun um breytt kjör mun liggja fyrir hjá bæjaryfirvöldum í Kópavogi á næstu vikum og endanlega við útgáfu skuldabréfa.