Listinn yfir aldraða sem bíða á Landspítalanum eftir varanlegri vistun á hjúkrunarheimili tæmist nánast með opnun 18 rúma deildar í dag á Landakoti. Í stað þess að bíða á Landspítalanum eftir búsetu á hjúkrunarheimili bíða nú sjúklingarnir á Landakoti.

Í kjölfar útboðs var samið við dvalar- og hjúkrunarheimilið Grund um rekstur deildarinnar sem þurft hafði að loka vegna manneklu. Starfsmenn deildarinnar verða um 25. Vegna breytinga á Grund koma nokkrir starfsmenn þaðan auk þess sem ráðnir hafa verið nýir, að sögn Júlíusar Rafnssonar, framkvæmdastjóra Grundar.

Í september síðastliðnum biðu um 90 sjúklingar á Landspítalanum eftir plássi á hjúkrunarheimili. Með nýju úthlutunarkerfi, þar sem þeir sem eru í mestri þörf eru teknir fyrst, hefur tekist að fækka á biðlistanum. „Áður gátu hjúkrunarheimilin valið hver yrði tekinn næst. Nú gengur þörf sjúklinganna fyrir og þess vegna fækkar á spítalanum,“ segir Björn Zoëga, starfandi forstjóri Landspítalans.

Hann segir að til þess að Landspítalinn missi ekki starfsmenn yfir til einkarekinna deilda eins og þeirrar sem Grund rekur þurfi að greiða þeim sambærileg laun við þau sem greidd eru í einkarekstri. „Það segir sig sjálft þegar svona stendur á. Við þurfum einnig að byggja upp þannig starfsmannastefnu að einstaklingarnir fái að njóta sín betur en hingað til. Ég vona að spítalinn stefni í sömu átt og heilbrigðisráðuneytið í þessum efnum.“

Guðlaugur Þór Þórðarson heilbrigðisráðherra segir stóra verkefnið vera að veita eins mikla þjónustu og mögulegt er fyrir það fjármagn sem er fyrir hendi. „Það er jafnframt verið að skoða hvað hægt er að gera til að fólk fái notið sín í starfi.“

Guðlaugur bendir á að nú sé unnið með skilvirkari og skipulagðari hætti en áður hafi verið gert á ýmsum sviðum. „Auk þess að vinna okkur í gegnum biðlista aldraðra sem bíða eftir hjúkrunarrými var nýlega undirritaður samningur við augnlæknastofurnar Sjónlag hf. og LaserSjón ehf. um 1.600 augasteinsaðgerðir næstu tvö árin. Á næsta ári ætti því biðlisti eftir slíkum aðgerðum að heyra sögunni til.“

Í hnotskurn