Eftir Elvu Björk Sverrisdóttur elva@mbl.is

Frumvarp sem felur í sér endurskoðun laga um eftirlaun ráðherra og þingmanna þyrfti að koma fram í þinginu í síðasta lagi á morgun, svo unnt verði að ljúka málinu á þeim dögum sem eftir eru af starfstíma þingsins, að sögn Sturlu Böðvarssonar, forseta Alþingis.

Undanfarið hafa Ingibjörg Sólrún Gísladóttir utanríkisráðherra og Geir H. Haarde forsætisráðherra lýst vilja til þess að endurskoða lögin á næstunni. Geir H. Haarde sagði í samtali við Ríkisútvarpið í gær að hægt yrði að ljúka málinu fyrir þinglok ef samstaða væri um það á Alþingi.

Eftirlaunalögin sem nú eru í gildi voru samþykkt árið 2003. Þau fela m.a. í sér að þingmenn, ráðherrar, dómarar og forseti Íslands geta á sama tíma stundað atvinnu og þegið eftirlaun frá ríkinu. Augljósustu álitaefnin nú snúa að því hvort hægt sé að breyta lögunum afturvirkt, en hópur þeirra sem lögin ná til nýtir þennan rétt sinn í dag. Í þessu sambandi hefur verið vísað til eignarréttarákvæðis stjórnarskrárinnar.

Ljóst er að skammur tími er til stefnu á yfirstandandi þingi. Í þingsköpum segir að eftir að frumvarpi er útbýtt þurfi að líða a.m.k tvær nætur þar til taka má það til umræðu. Þá þarf þingið að samþykkja afbrigði frá þingsköpum eigi að taka málið fyrir, en slíkt þarf að gera þegar frumvörp koma fram eftir 1. apríl. Að sögn Sturlu hefur það verið gert tvisvar sinnum í vor, varðandi frumvörp um almanna- og sjúkratryggingar.