Nú eru starfandi 188 dagforeldrar í Reykjavík og eru þeir með pláss fyrir um 890 börn. Þar með er pláss fyrir um 26% barna á fyrsta og öðru ári sem búsett eru í Reykjavík, skv. tölum frá Hagstofu Íslands.

Helga Kristín Sigurðardóttir, dagmóðir, bendir á að þó þörfin sé mikil séu ekki foreldrar allra þessarra barna að leita að plássi því sumir séu með börn sín heima þar til þau komast á leikskóla.

Þegar ekki fæst pláss hjá dagmömmu setja margir foreldrar barnið á biðlista eftir plássi „í þeirri fölsku von að þeir komi barni sínu að“, eins og ein dagmóðirin orðar það, vegna þess að biðlistinn getur verið langur og margir mánuðir liðið þar til fyrsta plássið losnar. Orsakast löng bið fyrst og fremst af því hve auðvelt er að fá pláss í leikskóla í hverfi barnanna en dæmi eru um að börn komin vel á þriðja ár séu enn hjá dagmömmu.

Að auki er ekki víst að pláss losni á heppilegum tíma. Ef pláss fæst t.d. mánuði áður en fæðingarorlofi lýkur er möguleiki á að tryggja sér plássið með því að greiða fyrir þann mánuð þó að þjónustan sé ekki nýtt.

Að sögn dagmæðra er þó óalgengt að foreldrar geri þetta enda þarf að greiða fullt verð fyrir mánuðinn hafi barnið ekki náð tilsettum aldri svo niðurgreiðsla fáist.

Dagforeldrar of valdamiklir

Dagforeldrar eru sjálfstætt starfandi og ákveða gjaldskrá sína og vinnutíma sjálfir. Ein móðirin sem 24 stundir ræddu við segir þetta galla. Dagforeldrar geti hækkað gjaldskrá sína og þar sem dagforeldrar séu mjög fáir geti foreldrar ekki annað en greitt.

Helga Kristín segist halda að almennt séu foreldrar látnir vita með góðum fyrirvara um slíkar breytingar og telur ólíklegt að mikil misnotkun valds eigi sér stað.

Önnur móðir bendir á að tímabilið frá því að fæðingarorlofi lýkur og þangað til barnið fer í leikskóla sé erfitt. „Maður er auðvitað þakklátur fyrir að hafa fengið pláss fyrir barnið hjá dagmömmu e n það þýðir endalaus hlaup því flestar eru bara með átta tíma pláss. “