Ragnar Eyþórsson í eldhúsinu eftir að ísskápurinn sprakk. mbl.is/Árni Sæberg

Eftir Örlyg Stein Sigurjónsson orsi@mbl.is

„Þetta er vægast sagt óvenjulegt,“ segir Birgir Ágústsson, sérfræðingur í rafmagnsöryggismálum hjá Neytendastofu, um gríðarmikla sprengingu sem varð í ísskáp Ragnars Eyþórssonar fyrir nokkru. Enn hefur ekki tekist að upplýsa orsakir sprengingarinnar en Neytendastofa mun kalla eftir skýrslu lögreglunnar um atvikið og tekur þá til við að athuga málið nánar.

Að sögn Birgis hefur lögreglan rannsóknarskyldu í málum af þessu tagi en Neytendastofa hefur með öryggi raffanga að gera. Segir Birgir að Neytendastofa muni skoða málið nánar í framhaldi af rannsókn lögreglunnar ef hún leiðir í ljós að eitthvað hafi verið að ísskápnum.
Hann segir að vitað sé um svipað tilfelli fyrir nokkrum áratugum, en þá sprakk gashylki í ísskáp.

Neytendastofa þarf ekki að hafa sjálfan ísskápinn í höndunum enda miðast rannsóknarforsendur stofnunarinnar að því að athuga hvort viðvarandi hætta gæti verið í nýjum ísskápum af sömu gerð og gera þá viðeigandi ráðstafanir ef í ljós kemur að svo sé.

Eigandi ísskápsins, Ragnar Eyþórsson, segir að ekkert hafi komið út úr rannsókn sem fram fór á verkstæði seljandans, Einars Farestveits, og fyrirtækið hafi ekki viljað fara út í viðameiri og kostnaðarsamari rannsóknir. Fyrirtækið hafi hins vegar boðið fjölskyldunni nýjan ísskáp vegna þessarar sérstöku aðstæðna, en tveggja ára söluábyrgðin var runnin út. Segir hann fyrirtækið hafa gert athugasemdir við skort á vettvangsrannsókn þar sem fagmaður hefði kannað atriði á borð við legu ísskápsins, gaslykt og fleira.