„Hrefnuveiðarnar eru engin stór prinsippákvörðun, því hún var tekin 2006,“ segir Einar K. Guðfinnsson sjávarútvegsráðherra. „Það hefði verið stór ákvörðun að hætta við veiðarnar,“ segir ráðherrann sem hefur ekkert nema gott að segja um viðbrögð Samfylkingarráðherranna og telur mótmæli þeirra ekki hörð og málið ekki stórt og alls ekki truflandi fyrir ríkisstjórnina.

Össur Skarphéðinsson ferðamálaráðherra útilokar hreint ekki að hrefnuveiðarnar verði teknar upp í ríkisstjórn. „Það er alveg ljóst að ef það kemur fram minnsta vísbending um að hrefnuveiðarnar hafi þau skaðlegu áhrif sem fyrirtæki í ferðaþjónustu telja, þá þarf ríkisstjórnin auðvitað að skoða málið betur. Ég mun gera það sem rétt er í þessari stöðu og halda fram hagsmunum þeirrar greinar sem mér er trúað fyrir, sem er ferðaþjónustan. Ég tel hrefnuveiðarnar andstæðar hagsmunum hennar.“

Geir H. Haarde forsætisráðherra styður ákvörðun sjávarútvegsráðherra og er sáttur við samstarfsflokkinn líka. Hann telur Ingibjörgu Sólrúnu Gísladóttur utanríkisráðherra bregðast jákvætt við. „ Hún lofar í sinni yfirlýsingu að útskýra málið út frá sjálfbærniforsendum ef hún væri beðin um að útskýra það á erlendum vettvangi og það tel ég mjög jákvætt.“ Nefnd forsætisráðherra um ímynd Íslands skilaði skýrslu þar sem upphaf hvalveiða 2006 er gagnrýnt. Skort hafi á samhæfingu atvinnugreina og hagsmunaaðila.