Húsið við Lækjargötu 2 sem var reist fyrir meira en 150 árum stórskemmdist í eldi fyrir rúmu ári. Júlíus Sigurjónsson

Borgarráð hefur samþykkt kaupsamning um Lækjargötu 2, sem gerður var við fasteignafélagið Eik en kaupverðið er 321 milljón króna samkvæmt samningnum. Í bókun meirihluta borgarráðs segir að þessi kaup séu nauðsynlegt til að hægt verði að vinna að uppbyggingu á reitnum og með kaupunum sé tryggt að hægt verði að hefja endurbætur við húsið fljótt og örugglega.

Fulltrúar minnihlutans í borgarráði gagnrýndu hins vegar  verðið, sem greiða á og segja að það sé hærra en verðið á Austurstræti 22 sem keypt var fyrir örfáum mánuðum. Þá undirstriki það að fyrir Laugaveg 4-6 hafi verið var greitt mjög hátt verð og ljóst að framgangan í Laugavegsmálinu hafi haft víðtækari áhrif til hækkunar ef marka megi það verð sem nú er greitt fyrir Lækjargötu 2. 

Reykjavíkurborg keypti Austurstræti 22 á síðasta ári fyrir  263 milljónir króna en með kaupunum fylgdu vátryggingabætur að fjárhæð 95 milljónir.

Þá var í janúar samþykkt að greiða 580 milljónir króna fyrir húsin við Laugaveg 4-6.

Í bókun meirihluta borgarráðs segir, að nú sé í auglýsingu deiliskipulag fyrir þetta mikilvæga miðborgarsvæði, sem byggist á hugmyndaleit sem fram fór vegna svæðisins í kjölfar brunans fyrir rúmu ári þegar húsin við Austurstræti 20-22 og Lækjargötu 2 brunni.  Kaupin á Lækjargötu 2 séu ein af lykilforsendum þess að þetta metnaðarfulla skipulag fái farsæla afgreiðslu og niðurstöðu.