Hæstiréttur hefur dæmt karlmann á fimmtugsaldri í 12 mánaða fangelsi, þar af 9 mánuði skilorðsbundið, fyrir kynferðisbrot gegn konu með því að hafa nýtt sér svefndrunga og ölvunarástand konunnar og reynt að hafa við hana kynferðismök. Maðurinn var dæmdur til að greiða konunni 500 þúsund krónur í bætur.

Héraðsdómur Reykjavíkur hafði áður dæmt manninn í 12 mánaða óskilorðsbundið fangelsi. Hæstiréttur segir, að við  ákvörðun refsingar mannsins hafi m.a. verið litið til þess að brot hans beindist gegn persónu- og kynfrelsi konu sem hann vissi að hafði átt við erfiðan geðsjúkdóm að stríða og þess að brotið hefði haft verulegar andlegar afleiðingar fyrir hana. Ákvörðun um að skilorðsbinda hluta dómsins var tekin vegna þess að verulegur dráttur varð á rannsókn málsins og maðurinn hafði ekki áður gerst sekur um refsiverða háttsemi.

Upphafleg ákæra var í tvennu lagi og var maðurinn ákærður fyrir kynferðisbrot gegn konunni  síðla árs 2003 og einnig 2005. Héraðsdómur sýknaði manninn af fyrri hluta ákærunnar en fann hann sekan um síðari hlutann.