Hæstiréttur hefur dæmt 19 ára gamlan karlmann í 3 mánaða skilorðsbundið fangelsi fyrir að líkamsárás á fyrrum unnustu sína. Maðurinn var hins vegar sýknaður af ákæru fyrir að svipta konuna frjálsræði. Hann var dæmdur til að greiða konunni 400 þúsund krónur í miskabætur.  

Brotið mannsins var framið árið 2006 þegar hann var 17 ára. Maðurinn var ákærður fyrir að hafa veist að konunni í bíl sínum, rifið  í  hár hennar  og  slegið  höfði  hennar í  glugga bifreiðarinnar, slegið hana með krepptum hnefa og flötum lófa í andlit og líkama.

Konunni tókst samkvæmt ákærunni að komast út úr bílnum í Hafnarstræti en þá elti maðurinn hana uppi og dró hana nauðuga aftur inn í bílinn og ók með hana út að Gróttu. Þar hélt hann áfram að veitast að konunni en ók að lokum að Eiðistorgi á Seltjarnarnesi þar sem hann henti henni út úr bílnum.

Stúlkan marðist víða á líkamanum og var með bitför á báðum ristum, hægri hásin og á hægri kálfa. Hæstaréttur taldi ekki hafið yfir skynsamlegan vafa að brotið hefði verið gegn frjálsræði stúlkunnar en en maðurinn var sakfelldur fyrir líkamsárás.

Hæstiréttur segir, að pilturinn hafi játað brot sitt að hluta. Hann hefði einungis verið 17 ára er hann framdi brotin og væri litið til þess til refsimildunar. Hins vegar yrði að líta til þess að líkamsárásin stóð yfir í langan tíma og hafði talsverðar afleiðingar í för með sér fyrir stúlkuna, einkum vegna þess áfalls sem hún varð fyrir er kærasti hennar beitti hana slíku ofbeldi.