Héraðsdómur Reykjavíkur hefur sýknað íslenska ríkið af bótakröfu endurskoðanda, sem ákærður var fyrir brot í starfi en sýknaður af ákærunni. 

Gunnar Örn Kristjánsson var endurskoðandi Tryggingasjóðs lækna um árabil en framkvæmdastjóri sjóðsins varð uppvís að stórfelldum fjárdrætti. Var Gunnar Örn ákærður fyrir brot í starfi sem endurskoðandi sjóðsins. Hann var sýknaður í héraðsdómi en Hæstiréttur vísaði málinu frá. Var í kjölfarið ákveðið að halda rannsókn málsins áfram en sú rannsókn dróst og loks var ákveðið að henni skyldi hætt.

Gunnar Örn krafðist 449 milljóna króna í bætur. Héraðsdómur taldi að ekki hefði verið sýnt fram á að rannsóknaraðilar eða ákæruvald hefðu sýnt af sér saknæma eða ólögmæta háttsemi eða ólögmæta meingerð gegn frelsi, friði, æru eða persónu Gunnars Arnar og að meint tjón hans vegna tapaðra launa, miska og spjalla á viðskiptahagsmunum og lánstrausti yrði rakið til sakar þeirra.