Frá mótmælum vörubílstjora í London í gær. AP

Víðar en á Íslandi mótmæla vörubílstjórar háu eldsneytisverði.  Vörubílstjórar í Bretlandi efndu til mótmæla í London og Wales í gær, og kröfðust þess að eldsneytisverð og eldsneytistollar yrðu lækkaðir.  Háu eldsneytisverði hefur einnig nýlega verið mótmælt í Taívan, Frakklandi, og í Bandaríkjunum.

Í kjölfar mótmælanna segir Gordon Brown, forsætisráðherra Bretlands, hátt eldsneytisverð komið til að vera, og að vandamálið hafa breytt úr sér um allan heim.  Segir hann að margt bendi til þess að vandinn sé til langtíma þar sem eftirspurn um allan heim sé mun meiri en framboð.  Brown átti fund með yfirmönnum í olíugeiranum í Skotlandi í dag og hvatti hann þá til þess að leita lausna við að auka olíubirgðir.  Brown sagðist vilja gera allt í sínu valdi til þess að hjálpa þeim sem eiga erfiðast með að mæta hækkandi kostnaði eldsneytis.

„Hvetur okkur áfram"

Um mótmæli vörubílstjóra í fleiri löndum segir Sturla Jónsson, talsmaður vörubílstjóra, að menn séu ánægðir með að fleiri standi upp og mótmæli háu eldsneytisverði.  „Þetta sýnir að þetta er ekki bara eitthvað röfl í okkur hér á Íslandi, við höfum stuðning víðar, þetta hvetur okkur áfram, menn eru ánægðir með þetta," segir Sturla.

Sturla segir vörubílstjóra ætla að halda mótmælum áfram.  „Á hádegi á morgun verðum við með jarðarför á loforðum ríkisstjórnarinnar, á Austurvelli fyrir framan Alþingishúsið, við verðum með líkkistur fyrir hvert ráðuneyti, 11 líkkistur, Jóhanna Sigurðardóttir sleppur, þar sem hún hefur verið að vinna fyrir fólkið, við sáum ekki ástæðu til þess að vera með líkkistu fyrir hennar ráðuneyti," segir Sturla og bætir við að vörubílarnir verði skreyttir með útfararborðum og krönsum.