Eydís Aðalbjörnsdóttir hefur verið ráðin aðstoðarmaður Herdísar Þórðardóttur alþingismanns Sjálfstæðisflokksins  í Norðvesturkjördæmi.
 
Eydís hefur verið búsett á Akranesi síðastliðin 8 ár en ólst upp á Suðureyri við Súgandafjörð. Eydís lauk stúdentsprófi frá Menntaskólanum á Ísafirði 1986, BS gráðu í landafræði frá Háskóla Íslands 1992, kennslufræði til kennsluréttinda 1996 frá Háskóla Íslands og MBA gráðu  frá Háskólanum í  Reykjavík 2007.

Eydís hefur  starfað sem grunnskólakennari á Seltjarnarnesi og Raufarhöfn.  Við flutning til Akranes hóf hún störf hjá Landmælingum Íslands sem verkefnastjóri í kortagerð.  Meðfram MBA námi sínu kenndi Eydís í Fjölbrautaskóla Vesturlands.  Síðastliðið ár hefur Eydís starfað í húsi atvinnulífsins sem verkefnastjóri fyrir Samtök ferðaþjónustunnar.
 
Eydís hefur starfað í bæjarmálum á Akranesi síðastliðin 6 ár, samkvæmt tilkynningu.  Á síðasta kjörtímabili var hún varabæjarfulltrúi fyrir Sjálfstæðisflokkinn ásamt því að sitja í skólanefnd og skipulags og byggingarnefnd.  Eydís var einnig formaður fulltrúaráðs Sjálfstæðisflokksins  á Akranesi á síðasta kjörtímabili.  Á þessu kjörtímabili situr hún sem  bæjarfulltrúi Akraneskaupstaðar ásamt því að vera varaforseti bæjarstjórnar og formaður skólanefndar.

Eydís er gift Þorkeli Loga Steinssyni útibússtjóra Sparisjóðsins Akranesi.  Þau eiga fjögur börn.