Í vetur hefur verið í gangi verkefni þar sem hópur drengja í áttunda og níunda bekk í Réttarholtsskóla í Reykjavík hefur fengið tækifæri til að fá útrás fyrir sköpunargáfuna á jákvæðan hátt.

„Þetta gengur út á það að fá stráka sem eru að fikta við veggjakrot til að vinna með grafík á hátt sem gæti skilað [...] einhverju jákvæðu,“ segir Frosti Örn Gnarr Gunnarsson, grafískur hönnuður og kennari, spurður út í verkefnið.

Að sögn Frosta hófst verkefnið í byrjun febrúar þegar hann hóaf vann með strákunum að því að gera veggmyndir. Síðan þróaðist verkefnið í að búa til boli með myndum eftir strákana, en verkefnið vísar í hip-hop menninguna.

Frosti segir að til að byrja með sé hægt að kaupa bolina í gegnum vefsíðuna www.inmate.is, en bolirnir eru prentaðir í fangelsinu á Kvíabryggju. Gangi þetta vel verða bolirnir vonandi settir í sölu í einhverjum verslunum. 

Aðspurður segir Frosti vonast til þess að fleiri skólar muni taka upp þetta verkefni, þannig að hægt sé að „vinna gegn veggjakroti áður en það byrjar. Að þeim [krökkunum] finnist veggjakrot kjánalegt þegar þeim er boðið að stunda það,“ segir Frosti.