Bjarni Júlíusson, formaður Stangaveiðifélags Reykjavíkur með fyrsta laxinn sem veiddist í Norðurá í fyrra. Það var 9 punda hrygna. mbl.is/Einar Falur

Laxveiðin hefst formlega í býtið á morgun er Guðmundur Stefán Maríasson, formaður SVFR, kastar flugu sinni á Brotið í Norðurá.

„Það er eðli okkar veiðimanna að vera bjartsýnir og það eykur bjartsýnina að við sáum laxa í ánni á laugardaginn,“ segir Guðmundur. Laxar sáust þá á þremur stöðum, þó reyndar ekki á Brotinu eða Eyrinni, þar sem byrjað verður að veiða.

„Það eru samt fiskar í ánni, það er ljóst. Og miðað við hvernig aðstæður eru er ekki ástæða til annars en vera nokkuð bjartsýnn, fyrir opnun Norðurár og fyrir sumarið í heild. Miðað við snjóalög ættu vötn að haldast ágætlega. Og miðað við hita og gott vor getur maður leyft sér að vona að göngur komi fyrr en í fyrra. Það hefur verið hausverkurinn undanfarin ár að júníveiðin hefur dottið niður.“

Guðmundur hlær er hann er spurður að því hvernig verði að vaða í fyrsta sinn út í ána undir vökulu augu fjölmiðlanna, en hann tók við sem formaður SVFR í vetur. „Ég er nú ekkert farinn að hugsa út í það enn,“ segir hann.

Á fréttavefnum votnogveidi.is kom fram í gær að sjóbirtingsveiðimenn hafi veitt tvo nýgengna smálaxa í Ölfusá og áður hafði einn veiðst í Hólsá. Guðmundur Stefán segir því að engin pressa sé á sér. „Það er búið að veiða fyrsta lax sumarsins - reyndar utan hefðbundins laxveiðitíma,“ bætir hann við.