Héraðsdómur Reykjavíkur. mbl.is

Þeir Annþór Karlsson, Ari Gunnarsson, Jóhannes Gunnarsson og Tómas Kristjánsson eru ákærðir fyrir að hafa á síðasta ári staðið fyrir stórfelldum innflutningi á eiturlyfjum, 4,6 kílóum af amfetamíni og tæpum 600 grömmum af kókaíni, til Íslands frá Þýskalandi ætluðum til söludreifingar.

Bræðurnir Jóhannes og Ari játuðu báðir fyrir dómi og sögðu Annþór hafa verið skipuleggjanda smyglsins. Þeir Annþór og Tómas kröfðust aftur á móti sýknu.

Tómas er sakaður um að hafa misnotað aðstöðu sína sem starfsmaður hraðsendingarfyrirtækisins UPS á Keflavíkurflugvelli til þess að miðla upplýsingum um hvernig haga skyldi sendingu og móttöku fíkniefnanna þannig að þau kæmust til mótakenda efnanna hér á landi án afskipta yfirvalda.

Annþóri er gefið að sök að hafa látið óþekktan mann senda eiturlyfin frá Þýskalandi með það í huga að taka á móti eða láta taka á móti þeim hér á landi. Bræðrunum er gefið að sök að hafa lagt á ráðin um smyglið með hinum tveimur.