Hópur Hafnfirðinga reynir nú að fá leyfi fyrir því að setja upp minnisvarða við danskan kirkjugarð. Í ómerktri gröf í kirkjugarðinum hvílir Bjarni Sívertsen sem oft er kallaður faðir Hafnarfjarðar. Kirkjugarðurinn er friðaður og óvíst hvort leyfi fyrir minnismerkinu fæst.

Faðir Hafnarfjarðar 

Bjarni Sívertsen kom fótum undir skipasmíði á Íslandi og var að auki mikill umsvifamaður í verslun í Hafnarfirði og fiskveiðum. Er hann oft nefndur faðir bæjarins og stendur um hann minnisvarði í Hellisgerði. Eftir að hann missti konu sína giftist hann danski stúlku og flutti með henni til Kaupmannahafnar þar sem hann lést tveimur árum síðar. 

Hópur eldri borgara í Hafnarfirði ákvað fyrir nokkru að ferðast til Danmerkur og kviknaði sú hugmynd hjá Kristjáni Guðmundssyni, framkvæmdastjóra öldrunarsamtakanna Hafnar, að gaman væri að minnast þessa merka manns. Sérstaklega með tilliti til þess að Hafnarfjörður fagnar nú 100 ára kaupstaðaafmæli.

Rannsóknarvinna liggur að baki

Kristján segir að fyrst hafi þetta takmark virst nokkuð fjarlægt en síðan hafi þetta hlaðið utan á sig og fólk frétti af þessu. Lítið var vitað um Bjarna eftir að hann flutti til Danmerkur og óvitað hvar hann væri grafinn. Með hjálp sendiherra Íslands í Danmörku og góðra manna sem voru fróðir um danska sögu tókst að þrengja leitina og bárust böndin að Lyngby kirkjugarðinum.  „Síðan ljósritaði systursonur minn kirkjubækurnar og sendi mér afrit með netpósti. Með aðstoð tókst mér svo að lesa í gegnum þær og komst að því að Bjarni reyndist liggja þar í ómerktri gröf.“

Friðaður kirkjugarður 

Björninn er þó ekki unninn því kirkjugarðurinn í Lyngby er friðaður og ekki er heimilt að hrófla við honum á neinn hátt. Hópurinn hefur meðferðis málmsteypu með sér með danskri og íslenskri áritun og vill gjarnan setja hann upp í kirkjugarðinum en verður mögullega að láta sér lynda að setja hann upp rétt fyrir utan garðinn. Mun hópurinn sækja messu í Lyngby kirkjuna kl 11 á sunnudag og eiga fund með ráðamönnum hans. Hafa verið bréfaskriftir á milli aðila í vetur. 

Sá elsti í hópnum níræður 

Hópurinn telur fimmtíu manns og er sá elsti níræður. Hefur margt verið gert og lögð sérstök áhersla á að kynna sér H.C Andersen og slóðir Jónasar Hallgrímssonar. Naut hópurinn velvilja velunnara og Hafnarfjarðarbæjar til að fjármagna förina sem lýkur á sunnudagskvöld.