Héraðsdómur Reykjavíkur hefur dæmt konu 450 þúsund krónur í  miska- og þjáningabætur vegna þess að óvarlega var staðið að meðhöndlun eiturefna á námskeiði, sem hún sótti í Listaháskóla Íslands.

Konan var að vinna við að móta, smíða og steypa grip úr plasti undir handleiðslu kennara. Við smíðina var notað tveggja þátta efni sem kennarinn hafði keypt og var efnunum blandað saman.

Konan krafðist 15,4 milljóna króna í bætur vegna varanlegs miska og örorku. Hún sagði að í nokkrum dögum eftir að áfanganum lauk hafi nokkrir nemendur fengið ofnæmisviðbrögð og leitað læknishjálpar. Konan hafi sjálfi veikst illa og hafi verið undir læknishendi síðan.

Við nánari rannsókn hafi komið í ljós að efnin sem notuð voru hafi innihaldið mjög hættulegt eitur sem geti valdið ofnæmi, ertingu og bruna á húð. Einnig geti efnið valdið ertingu og ofnæmi berist það í lungun. Áhrif þessarar eitrunar geti verið óafturkræf. Konan taldi ofnæmisviðbrögðin, sem hún fékk, vera viðvarandi og hún þurfi enn á læknismeðferð að halda vegna þessa. 

Dómurinn taldi sannað, að konan hafi orðið fyrir tímabundnu heilsutjóni, fengið útbrot og haft veruleg óþægindi í húð í kjölfar námskeiðsins.  Hins vegar samræmist einkennin, sem konan hafi haft síðar, best ofsakláða. Ótal orsakir geti verið fyrir  því fyrirbæri en þar á meðal séu rokgjörn efni og mataræði. Almennt sé mjög erfitt og oft nánast ógerningur að staðfesta slíkt orsakasamband. Því var ekki talið sannað að varanleg örorka og miski konunnar stafaði af atvikinu.