Sturla Jónsson, sem farið hefur mikinn í mótmælum atvinnubílstjóra síðustu vikur og mánuði, segir að hinn nýstofnaði Lýðræðisflokkur verði keyrður á fulla ferð áfram, ekkert verði gefið eftir. Tíminn muni hins vegar leiða í ljós hvort hann hafi burði til að tefla fram listum á landsvísu.
Sturla stofnaði nýtt stjórnmálaafl ásamt félögum sínum í gær. Gengur það undir nafninu Lýðræðisflokkurinn. Að hans sögn er unnið að því að setja saman stefnuskrá flokksins, en barist verði fyrir þeim málum sem þeir félagar hafi haldið mest á lofti hingað til auk þess sem málefni aldraðra verði fyrirferðamikil. Stefnt er að því að opinn fundur verði haldinn í næstu viku til þess að áhugasamir geti skráð sig í flokkinn.
Sturla fullyrðir að það vanti nýtt stjórnmálaafl, á Alþingi vanti mann sem tali tungumál alþýðunnar. Sjálfum finnst honum umræðan á þinginu einkennast of mikið af orðagjálfri og eiginhagsmunapoti. Sturla segir að ekki hafi verið talað um annað en hann yrði formaður flokksins og segist hann finna fyrir miklum stuðningi.